Быд во тулыснас юркар бердса посёлокъясысь – Выльтыдор, Трёхозёрка, Максаковка, Сьӧдкыркӧтш да Гӧрд Затон – чукӧртчӧны комиӧн сьылысь-йӧктысь-ворсысь артистъяс да петкӧдлӧны ӧта-мӧдныслы, а сідз жӧ бур йӧзыслы ассьыныс сямлунсӧ.

Татшӧмсяма фестивальсӧ мӧвпыштлісны эз этша ни уна, буретш дас ӧти во сайын «Коми войтыр» ӧтмунӧмлӧн Сыктывкарса юкӧн да Сыктывкарса коми культура шӧрин. Окота вӧлі, мед коми кывйыс юргис тшӧтш и роч посёлкъясын. Мед йӧзыс кылісны коми кывсӧ, эз ӧтдортчыны сыысь, нимкодясисны сійӧн да, гашкӧ, и велӧдісны на. А мыйӧн медкокньыд йӧз дорас вайӧдны кывтӧ? Дерт жӧ, сьылӧм-йӧктӧмӧн!

И со быд во ытваыскӧд ӧттшӧтш миян фестиваль тулӧ енэжӧдзыс. Сылӧн гора небыд шыыс йӧлӧгаӧн кывтӧ Эжва да Сыктыв юяс весьтӧд вылӧ да ылӧ.

Тавося фестиваль вылын петкӧдчисны вылыс Максаковкаысь «Максаковочка» сьылан котыр, веськӧдлысьыс Ольга Ульнырова; Выльтыдор посёлокса культура керкаысь артистъяс Ольга Жакова веськӧдлӧм улын; Выльтыдорысь «Сударушка» сьылан-йӧктан котыр, кодӧн веськӧдлӧ Ольга Мруг; Затонсаяслӧн «Барыня», «Журавушка», «Реченька» сьылан котыръяс, Николай Якубин да Владислав Малых веськӧдлӧм улын да «New Style» йӧктан котыр Татьяна Хохолкова веськӧдлӧм улын.

Дерт, кыдзи и пыр, гаж вылын петкӧдчисны и карысь воӧм гӧсьтъяс. Тайӧ юркарса коми культура шӧринысь «Эжва катыд» сьылан котыр, веськӧдлысьыс Зинаида Пупышева да шӧринса зільысь-сьылысь Анна Ульянова.

А «Коми му» газетса корреспондент Екатерина Макарова гаж чӧж нюммӧдіс видзӧдысьӧс америкаса журналисткаӧс ворсӧмнас.

Ми шуам: «Видза колян, фестиваль!» Мед мӧд во та кадӧ горӧдны: «Видза олан, фестваль!»

коми