Юркарын вӧчисны кывкӧртӧдъяс велӧдысьяслӧн конкурслы, кытчӧ пырӧдчисны Коми Республикаса уна муниципалитетысь 20 велӧдысь.

Республикаса тшупӧдӧ пырӧдчисны кык сыктывкарса велӧдысь — Пушкина нима гимназияысь англия кыв велӧдысь Анна Иванова да 18-ӧд школаысь физика велӧдысь Светлана Рубцова. Вит лун чӧж педагогъяс петкӧдлісны ассьыныс сямсӧ вит вермасьӧмын: «Урок», «Урокъяс бӧрся удж», «Мастер-класс», «Велӧдан проект» да «Министркӧд сёрни».

Медводдза кык конкурсын петкӧдчӧм бӧрын Анна Иванова веськаліс конкурслӧн кӧкъямыс лауреат лыдӧ. Вермысьӧн жӧ лои Кулӧмдінса шӧр школаысь англия кыв велӧдысь Ольга Сковородникова, коді петкӧдлас республиканымӧс ставроссияса тшупӧдын.

Коми Республикаса Юралысь Сергей Гапликовлысь конкурсӧ пырӧдчысьяс дорӧ шыӧдчӧмсӧ лыддис Комиын йӧзӧс велӧдан, наука да том йӧз политика министр Наталья Якимова.

«Рочмуса велӧдысь» — тайӧ абу сӧмын сям кыпӧдан конкурс, тайӧ – республикаса олӧмын тӧдчана лоӧмтор. Комиын Туйдысь воӧ конкурслӧн содӧ тӧдчанлуныс. Тіян пиысь быдӧн тӧдӧ, кутшӧм пай вермӧ пуктыны велӧдысь и кутшӧм колана, медым ныв-зон олӧмын паныдасис бур велӧдысь да туйдысь»,— гижӧма Сергей Гапликовлӧн шыӧдчӧмын.

«Конкурсӧ быд пырӧдчысь – тайӧ вермысь нин, сы вӧсна мый тіянӧс бӧрйисны нин муниципалитет тшупӧдын, ті петкӧдлінныд ассьыныд кужӧмъястӧ да тӧдӧмлунъястӧ жюрилы. Миян муын быдмӧны зэв бур челядь, кодъясӧс велӧдӧны уджсӧ радейтысь педагогъяс. Аттьӧ тіянлӧн уджсьыныд», – шуис юркарса мэр Валерий Козлов.