Йирым 18 лунö Юралысьбердса искусство гимназияын жуисны коми том йöз. Найöс öтувтіс Том йöзлöн выль коми сьыланкывъя республикаса VI «Койташ» фестиваль. Сійöс котыртіс Сыктывкарса коми культура шöрин.
Тавося «Койташыс» торъяліс воддзаяссьыс. Шуам, медводдзаысь на гаж котыртысьяс урчитісны вит нимпас.
Медбур сьылысьясöс донъялісны том йöз: «Югöр» студияысь звукорежиссёр Игорь Желобнев; «BEAT MAKERS» котырöн веськöдлысь Евгений Лисовский; «Ручеек» сьылан котырöн веськöдлысь Александра Шляхтова да Россияса гижысь котырö пырысь Ольга Баженова. Найö эз сöмын донъявны сьылысьясöс, но и висьталісны, кыдзи позьö енбинысö водзö бурмöдны-сöвмöдны.

«Койташыс» ставнас вöлі «Оскар» сяма. Вермысьсö йöзыс тöдмалісны фестиваль вылас сöмын. Сыктывкарса «Театр модысь» мича нывъяс петкöдісны донъялысьяслы конверт, буретш сэтчö вöлі гижöма нимпасын вермысьсö.
Юркарса «Томлун» котыр вермис «Выльмöдöм коми йöзкостса сьыланкыв» нимпасын, Сыктывкарысь Анна Ульянова да Артемий Барсуков – «Медбур эстраднöй сьыланкывйын». Медбур коми бард — Кулöмдін районса Помöсдінысь Дмитрий Филиппов. Финскöй «Rakkauden haudalla» сьыланкыв лои медбур каверöн, сійöс сьыліс Евгения Удалова. Но а видзöдысьяслы сьöлöм выланыс воöма Кулöмдін районса Дон сиктысь Артур Гарновлöн сьылöмыс, сылы «ВКонтактеын» пуктöмаöсь медся уна лайк.

Сыктывкарса коми культура шöринöн веськöдлысь Наталья Шахова пасйис: «Койташын» вöліны и выль нога юргысь йöзкоста сьыланкывъяс, и каверъяс, позис кывны и саксофон, и электро-гитара – дзик быдöн вермис кывны сьöлöм вылас воанаторсö. Но могным ёна ыджыдджык: колö нимöдны коми кывсö выль сьыланкывъяс пыр. Унаöн «Койташ» бöрын, шуам, йöзöдісны кывлöм выль сьыланкывъяссö öтуввезйын. Сідзкö, том йöз найöс збыльысь кывзöны. Нöшта эм мöвп, дасьтыны «Койташса» сьыланкывъясöн диск. Бöръяысьсö сійö важöн нин петавліс, 2012 воын. А эз кö мойви «койташасьны» миянкöд, позяс видзöдны фестивальсö телевизор пыр йирым 28 лунö «Юрганса» «Миян йöз» уджтасын да вöльгым 6 лунö «Коми горса» «Ас му вылын» уджтасын».

Фестиваль котыртысьяс аттьöалöны режиссёр Галина Алёшинаöс, Юралысь бердын искусство гимназияса уджалысьясöс, «МУЗМИР» да «КРАСОТА profi» котыръяс, «Коми гор» да «Юрганса» уджалысьясöс, Коми Республикаса Каналан Сöветсянь Россия Федерацияса Федеральнöй Собраниелöн Сöветö пырысь Валерий Марковöс, Вöр-ва озырлун, вöр-ваöн вöдитчан да экология комитетöн веськöдлысь Василий Смалийöс, Коми йöзöдчан керка, Коми республикаса вужвойтырлöн шылада-драмаа театр, В. Савин нима государственнöй академическöй драма театр, «Югыд-Арт» котыр, «Шуда олöм» туризм шöрин, «Мича Райда» мичмöдчанiн, «Atmosfera» фитнес-клуб, «Скала» спорт шöрин, «Новая генерация» футболасян клуб, «Mary Kay», Coffee smile», «Coffee like» котыръяс, «GREEN HOUSE» да «MANIA» лавкаяс, Коми ремесленнöй палата, «Пронькерс» пиццерия.

коми