Сыктывкарын ӧкмысӧдысь нин нуӧдісны Республикаса коми КВН. Быд во сійӧс котыртӧ юркарса коми культура шӧрин.

Таво КВНасисны быдса кык лун: медводдза лунас вӧлі семинар, а мӧдас КВНыс

Семинар дырйи КВНщикъяс водзын сёрнитісны фестиваль нуӧдысь Анжелика Елфимова, Кулӧмдінса «Скӧрӧдумсаяс» котырӧн веськӧдлысь Игорь Князев да КВНын ворсысьяслӧн республикаса ӧтмунӧмӧн юрнуӧдысь Александр Корзун. Найӧ висьталісны, кыдзи гижны тешкодя, шыльӧдны-мольӧдны шмоньсӧ да дасьтыны КВН кежлӧ верстьӧӧс да челядьӧс.

Тыдалӧ, ворсысьяс ставсӧ пель саяныс сюркнялӧмаӧсь: фестиваль лунас став котырыс бура петкӧдчис, донъялысьяслы зэв сьӧкыд вӧлі бӧрйыны медбуръяссӧ.

Медводдза места да «Медся серамбана рака поз» статуэтка вичмис «Эжва йывса бабаяслы». Тайӧ котырас кык ныв и эм, но налӧн шмоньысь йӧзыс кочкавтӧдзныс сералісны. «Медся ёсь кывъя рака позйӧн» донъялысьяс шуисны ставлы тӧдса «КилоМэтръясӧс», найӧ босьтісны мӧд места. Нималана «Скӧрӧдумсаяс» котыр лои коймӧдӧн да нуис Кулӧмдінӧ «Медся сюсь рака поз» статуэтка.

Коми-Перым кытшысь «Ёгвуси» котырӧс позис шуны медся сьылысьӧн. Кӧть и мӧд кывйӧн сёрнитӧны, а петкӧдчӧмныс вӧлі зэв тешкодь, и видзӧдысьяс кокниа найӧс гӧгӧрвоисны. Перымсаясӧс пасйисны «Вылын юра рака пиян» нимпасын. Кӧрткерӧсса «Одыбса репастӧг» коми КВНыд оз кольлы. Тайӧ котырсӧ шуисны «Ныриса рака пиянӧн». А «Пӧшти рака пиян» статуэтка вичмис Изьва районса «Бандерлогъяслы».

Тавося КВНыс вӧлі лов кыпӧдана, сійӧ збыльысь ӧтувтіс коми войтырсӧ.

Сыктывкарса коми культура шӧринӧн веськӧдлысь Наталья Шахова пасйис: «Нимкодь, мый видзӧдысьяс зэв шоныда паныдалісны КВНщикъясӧс, тайӧ зэв ёна ыззьӧдіс ворсысьяссӧ. Дерт, видзӧдысьяс кӧ аттьӧалӧны миянӧс фестиваль котыртӧмысь, бур кывйӧн казьтылӧны сійӧс, сідзкӧ, огӧ весьшӧрӧ уджалӧй, тайӧ ставыс колӧ йӧзыслы. Локтан вонас ми бара на паныдасям, сӧмын карса коми КВНын нин».

***

КВН подулалысьяс: Коми Республикаса национальнӧй политика министерство да «Сыктывкар» кар кытшлӧн муниципальнӧй юкӧнлӧн администрацияса культураӧн веськӧдланін.

Фестиваль котыртысь: Сыктывкарса коми культура шӧрин

КВН котыртысьяс аттьӧалӧны Коми Республикаса Торгово-промышленнӧй палата, «Серебряная тайга» котыр, Коми ремесленнӧй палата, «Амбар» кафе, «Хлеб забыли» пӧжасянiн, «Mania» вузясянiн.

Фото с мероприятия здесь: https://vk.com/komi_kultura?z=album-41257129_268695887

коми