«Сыктывкар» кар кытшлӧн муниципальнӧй юкӧнса администрацияын культураӧн веськӧдланін, Сыктывкарса коми культура шӧрин да «Коми войтыр» дінмукостса ӧтйӧза öтмунöмлöн Сыктывкарса юкӧн котыртісны «Райда» конкурс.

Таво конкурсӧ пырӧдчис вит ныв: Полина Валей (Сыктывкарса гуманитарно-педагогическӧй колледж), Валерия Вокуева (Сыктывкарса канму университет) Ксения Мишарина (Коми национальнӧй гимназия), Нина Романова (Сыктывкарса канму университет) да Валерия Филиппова (К оми Республикаса искусство колледж).

Медводдзаысь вӧлі нуӧдӧма конкурссӧ онлайн, но мукӧд вося «Райдасьыс» сійӧ эз ёна торъяв, кызвыннас ставыс важ ногыс вӧлі. Конкурсыс артмис куим юкӧнысь, та вӧсна быд ныв дасьтiс куим видео. Медводдзаыс шусис «Ас йылысь висьт», тані конкурсӧ пырӧдчысьяс юксисны видзӧдысьяскӧд олӧманыс тӧдчана вермӧмъясӧн, петкӧдлісны енбиалуннысӧ. Мӧд юкӧнас, сійӧ шусис «Важ йӧз шулӧмаӧсь», нывъяс гӧгӧрвоӧдісны, ёна-ӧ бура тӧдӧны коми оласног.

Конкурсӧ пырӧдчысьяс петкӧдлісны кагаӧс вомидзысь бурдӧдӧм, йи колльӧдан обряд, кӧлысьдырся сьыланкывъяс да бӧрдӧдчанкывъяс, азьла мынтӧм – Троича лунӧ во быдӧн верӧс сайӧ петӧм нывъясӧн видз вылын сиктсаясӧс гӧститӧдӧм. Коймӧд юкӧныс – тайӧ ставлы тӧдса карнанӧн ветлӧм. Сӧмын водзті ва тыра ведраяса нывъясӧс йӧзыс сцена вылысь аддзисны, таво конкурсӧ пырӧдчысьяс лымйӧн вевттьысӧм му кузя ветлісны – найӧс снимайтісны Киров нима паркын.

Видео серти нывъясӧс донъялісны: фольклор туялысь Коми войтыр» дінмукостса ӧтйӧза öтмунöмлöн Сыктывкарса юкӧнӧн веськӧдлысьӧс вежысь Алексей Николаевич Рассыхаев; «Сыктывкар» кар кытшлӧн муниципальнӧй юкӧнса администрацияын культураӧн веськӧдланінын зільысь Татьяна Михайловна Агаркова да Коми республикаса вужвойтырлӧн шылада-драмаа театрын ворсысь Владимир Андреевич Уляшев. Найӧ видзӧдісны-кывзісны, кыдзи нывъяс коминас сёрнитӧны, кужӧны-ӧ карнанӧн вӧдитчыны, асьнысӧ колана ногӧн петкӧдлыны, ёна-ӧ лыддьысьӧмаӧсь обряд дасьтігӧн да уна мукӧдтор.

Донъялысьяс висьталӧм серти, кывкӧртӧдсӧ пӧ сьӧкыд вӧлі вӧчны, став нылыс пӧ лӧсьыда дасьтысьӧма да, но коліс бӧрйыны медбуръяссӧ. Коймӧд тшупӧда диплом да «Пӧлӧзнича» ним вичмис Валерия Филипповалы. Интернетын Шӧрин котырса подписчикъяс пӧвстысь медся унаӧн шуисны сійӧс нӧшта на и «Медся муса нылӧн». Мӧд места да «Катшасин» ним шедӧдіс Валерия Вокуева. А вермысьнас донъялысьяс шуисны Ксения Мишаринаӧс. Буретш сійӧ и петкӧдчас локтан во республикаса «Райдаын» Сыктывкарсянь.

Конкурсӧ пырӧдчысьяслы вичмисны дипломъяс да козинъяс, а «Пӧлознича», «Катшасин», «Райда» да «Медся муса ныв» ним шедӧдысьяс босьтісны нӧшта и сьӧм.

Нывъяслы козинъясысь фестиваль котыртысьяс аттьӧалӧны «Европа Плюс Коми» радиостанция. Веськӧдлысьыс, Андрей Вячеславовчи Юркин, сетіс I, II да III тшупӧда диплом шедӧдысьяслы кинотеатрӧ кык билетан. А Нина Романовалы да Полина Валейлы вичмисны пицца да ролл вылӧ сертификатъяс.

коми

КомиВойтыр