Таво Сыктывкар тыртіс 240 во. Тайӧ тшупӧда пасыслы и сиӧма вӧлі ворсӧмыс. Ордйысьӧмсӧ шуим вӧчны восьсаӧн, а сідзкӧ конкурсас вермисны пырӧдчыны мукӧд кар-районъясысь котыръяс. Таво ворсісны кӧрткерӧсса «Одыбса репас» да «Коланторъяс», а нӧшта перымса «Кашкавда». Сыктывкарсянь КВНын петкӧдчисны ставлы тӧдса «КилоМэтръяс» да «Эжвайывса бабаяс».

Конкурсыс вӧлі онлайн: командаяс водзвыв ыстісны видеояс. Йӧзыд ӧд велалісны аддзыны ворсысьясӧс сценаысь, а ӧні командаяс снимайтчӧмаӧсь и уличын, и сиктса керкаын, и карса патераын. Тавося КВНын вӧлі сӧмын ӧти конкурс– шылада гортса удж «Сюзь Матвейлӧн быдтасъяс». Сэні медъёна шмонитісны, дерт жӧ, коронавирус йылысь.

Конкурссӧ гортса коз пу дорын сулалӧмӧн нуӧдіс изьваса «бандерлог» Григорий Пыстин: сійӧс видеосянь жӧ ставӧн аддзисны-кывзісны.

Командаясӧс донъялісны: коми КВНлы подув пуктысь гижысь Анжелика Геннадьевна Елфимова, «Юрган» телеканалысь нималана журналист Александр Григорьевич Пивкин, Виктор Савин нима государственнӧй академическӧй драма театрын ворсысь Дмитрий Петрович Греченюк.

Тавося КВНын ёна нималісны кӧрткерӧссаяс: медводдза места вичмис «Коланторъяслы», а «Одыбса репас» лои коймӧдӧн. Мӧд места шедӧдісны карса «КилоМэтръяс». Медбура ворсысьнас донъялысьяс кӧрткерӧссас жӧ шуисны – «Коланторъясысь» Юлия Поповаӧс. Ставныслы вичмисны дипломъяс да сьӧма козинъяс.

Коми КВН подулалысь: «Сыктывкар» кар кытшлӧн муниципальнӧй юкӧнса администрация
Конкурс котыртысьяс: «Сыктывкар» кар кытшлӧн муниципальнӧй юкӧнса администрацияын культураӧн веськӧдланін, Сыктывкарса коми культура шӧрин да «Коми войтыр» дінмукостса ӧтйӧза öтмунöмлöн Сыктывкарса юкӧн.
Коми КВН котыртысьяс аттьӧалӧны козинысь Коми йӧзӧдчан керка.

КОМАНДАЯСЛЫСЬ ВИДЕОЯССӦ ЙӦЗӦДАМ, ВИДЗӦДӦЙ!

коми